Təhsildə inkişaf və innovasiyalar üzrə VII Qrant müsabiqəsi çərçivəsində qrant qazanmış Məktəblinin yeni dostu: Khan Academy Azərbaycanca II  layihəsi Nardaranda uğurla icra olunur
Khan Academy onlayn təhsil platforması, pedaqoqların, şagirdlərin və valideynlərin diqqətini cəlb edərək, sinif daxilində öyrənənlərə əhəmiyyətli təsir göstərmişdir. Onun təsiri bir neçə əsas amildən qaynaqlanır:
Əlçatanlıq: Khan Academy riyaziyyat fənnini, təbiət və humanitar elmləri, test hazırlıqlarını geniş əhatə edən pulsuz onlayn təhsil platformasıdır. Bu əlçatanlıq öyrənmə üçün maneələri aradan qaldıraraq, coğrafi mövqeyindən və sosial-iqtisadi vəziyyətindən asılı olmayaraq, bütün şagirdlərə yüksək keyfiyyətli beynəlxalq təhsil almaq imkanı verir. Bu o deməkdir ki, müəllimlər sinifdə  müxtəlif ehtiyaca və qabiliyyətə malik olan şagirdləri dəstəkləmək üçün öz dərs proqramına Khan Academy resurslarını əlavə edə bilərlər.
Aztəminatlı ailələrin uşaqları üçün belə bir layihənin mövcudluğunu çox önəmlidir. Layihənin məktəbdə təqdim olunandan sonra şagirdlər sinifdən kənar, evdə də Khan Academy Azərbaycanca platformasından istifadə edirlər. Misal olaraq qeyd edə bilərik ki, Nardaranda bəzi şagirdlərin əlavə müəllim yanına getməyə imkanları yoxdur və eyni zamanda, valideynlər təhsillərini yarımçıq qoyduqları üçün öz övladlarına köməklik göstərə bilmirlər, belə olduğu halda Khan Academy Azərbaycanca platformasında yerləşdirilən resurslar şagird və hətta valideynlər üçün öyrənmək imkanları yaradır. Platforma şagirdlərə riyazi problemlərin həlli üçün fərqli yolların mövcudluğunu göstərir. Layihə zamanı bəzi siniflərdə uşaqların riyazi biliklərinin çox aşağı olduğunun şahidi olduq. Onların hətta iyirmiyə qədər toplama və çıxmada problemləri var idi. Khan Academy platforması mövcud problemin həlli üçün bir vasitədir, çünki platforma sıfırdan öyrənməni təşviq edir. Layihə icra olunduğu zaman Khan Academy dərslərinə uşaqlar böyük maraq göstərirdi. Onlar həm öyrənir, həm də əylənirdilər. Platformada bal sisteminin mövcudluğu şagirdlərin öyrənməyə qarşı marağını daha da artırır. Layihədə iştirak edən hər bir şagird yüksək bal toplamaq üçün verilən video və tapşırıqları dəqiqliyi ilə icra etməyə çalışırlar.
2. Fərdiləşmiş Öyrənmə: Platforma fərdi şagird nəticəsinə əsaslanaraq, interaktiv resurslar vasitəsilə şagirdin inkişafını təmin edir. Bu fərdiləşmiş yanaşma şagirdə şəxsi qavrama sürəti ilə öyrənmə imkanı yaradır. Sinif şəraitində müəllimlər Khan Academy-dən istifadə edərək, hər bir şagirdin hansı mövzu üzrə boşluqlarının olduğunu asanlıqla izləyə bilir. Əlavə olaraq, bu şagirdin özü üçün də əlverişlidir, çünki evə gedib başa düşə bilmədiyi mövzunu platformada yerləşən videolar vasitəsi ilə dəfələrlə izləyə və təkrar-təkrar tapşırıqları icra edə bilir. Bir çox halda şagirdlər başa düşə bilmədikləri mövzunu müəllimdən təkrar soruşmağa çəkinirlər, bu zaman onlar Khan Academy resurslarına müraciət edə bilirlər.
3. Şagird nəticəsini izləmə mexanizmi: Khan Academy müəllim platforması müəyyən bir mövzuda şagirdin bilik və bacarıqları ölçmək üçün önəmli statistik məlumatlar təqdim edir. Müəllimlər tələbələrin iştirakını izləyə, xüsusi bacarıqlarının mənimsənilməsinə nəzarət edə və şagirdlərin çətinlik çəkdiyi mövzuları müəyyən edə bilirlər. Şagirdin qavramasını müəyyən edən statistik məlumatlar müəllimlərdən şagirdlərin çətinlik çəkdiyi mövzuların üzərindən yenidən keçməsi üçün bir zəmin yaradır. Belə yanaşma tədris strategiyalarını optimallaşdırır.
4. Khan Academy layihəsi çevirilmiş sinif modelini təşviq edir, yəni tələbələr evdə Khan Academy dərsləri ilə məşğul ola bilərlər və dərs vaxtının praktiki fəaliyyətlərə, qrup müzakirələrinə və müəllimin fərdi dəstəyinə ayrılmasına sərf edə bilərlər. Bu yanaşma şagirdin fəallığını artırmaqla, mövzuların daha dərindən başa düşülməsinə və sinif mühitində fəal öyrənməyə səbəb ola bilər. Bu məqamı gələcəkdə nəzərə almaq olar.
5. Müəllimlər üçün peşəkar İnkişaf: Khan Academy layihəsi müəllimlərin beynəlxalq tədris təcrübələrini təkmilləşdirməyə imkan yaradır və sinif otaqlarında texnologiyadan effektiv şəkildə istifadəni təmin edir. Khan Academy layihəsi müəllimlərin peşəkar inkişafını dəstəkləyir və müəllimlərə tələbələrin bilik və bacarıqlarının inkişafı üçün rəqəmsal cihazlardan istifadə etmək imkanı verir.
Ümumilikdə, Khan Academy layihəsinin sinif daxilində öyrənənlərə təsiri çoxşaxəlidir: əlçatanlıq, fərdi öyrənmə, şagirdin nəticəsinə əsaslanan tədris proqramı, təlimat modelləri, peşəkar inkişaf aspektləri və s. Bu resurslardan və strategiyalardan istifadə etməklə, müəllimlər tələbələrinin müxtəlif boşluqlarını aradan qaldıraraq, dinamik öyrənmə mühitləri yarada bilərlər və akademik uğur əldə etmək üçün şagirdlərin bilik və bacarıqlarını artıra bilərlər.